Йокы, син нигә шундый тәмле?

Йокы – организмның аерым бер катлаулы формасы. Аның дәвамында организм ял итә, көч туплый. Шуңа да сәламәт кеше йокыдан энергия белән уяна.

Дөрес туклану, көн режимын дөрес итеп төзү, җитәрлек вакыт йоклау – сәламәтлек ныклы булсын дисәң, шушы өч пунктны онытмаска кирәк. Кеше үз гомеренең өчтән берен йоклап уздыра.

Йокы туймау безгә начар тәэсир итә: юмор хисе кими, ачу арта, үз эчебезгә бикләнәбез, һаман-һаман бер үк проблема турында уйланабыз. Йокының 4 сәгатькә азрак булуы да безнең реакцияне 45 процентка киметә икән.

Табиблар йокының начар булуы инсульт, инфаркт, гипертония һәм башка җитди авыруларга китерергә мөмкин, ди. Җитмәсә, эшнең нәтиҗәлелеген генә кимеп калмый, бу хәтер начараюга, нерв какшавына, гомернең озынлыгы кимүгә, яман шеш авыруларына да китерә. Халыкның 35-40 проценты йокы туймаудан интегә икән.

Ә җитәрлек дәрәҗәдә йокласаң, бу йөрәк-кан тамырлары авыруларына, симерүгә профилактика була. Йокы баш миен начар әйберләрдән арындырырга, нейрон тоташтырмаларын (соединение) кирәкмәс аксымнардан азат итәргә ярдәм итә.

Йокыны ничек туйдырырга?

1. Йокламыйча калган сәгатьләреңне “җыеп” барма.

2. Йоклар алдыннан кофеин булган эчемлекләр эчмә. Алар нерв системасына начар тәэсир итә.

3. Йоклар алдыннан ашап яту зыянлы. Кичке аш белән йокы арасында 4 сәгатькә якын вакыт узарга тиеш.

Ләкин шул ук вакытта артык йоклау да файдалы түгел икән. Галимнәр фикеренчә, олы кеше өчен идеаль йокы 7-8 сәгать булырга тиеш. Кайбер белгечләр хатын-кызларның эмоциональлеге аркасында аларга моңа өстәп тагын бер сәгать йокы кирәк, дип саный. Балалар организмына 10 сәгать йокы зарур икән. Җитәрлек итеп йоклау аларда игътибарсызлыкны, гиперактивлыкны киметә, үз-үзләрен тотышларын яхшырта.

http://yalkyn.com/tejribe/34181/