Дөрес каникуллар күңелле уза

«Балалар — тормыш чәчәге» дигән сүз бөтен кешегә дә таныш, һәм, әлбәттә, бу «чәчәкләр»нең җәйге чорда аеруча якты чәчәк атуы беркемгә дә сер түгел. Бу мәсьәләдә мәгариф, мәдәни өлкә хезмәткәрләре аеруча булыша, төрле яшьтәге балалар өчен төрле уен мәйданчыклары оештыралар.

«Вектор» яшьләр үзәге белгечләре тарафыннан 5 июльдә 7 яшьтән 14 яшькә кадәрге балалар өчен ел саен уздырыла торган «Җәйге каникуллар кояшы астында» дигән кыска вакытлы балалар ишегалды мәйданчыгын ачу ачык мисал булып тора. Яшьләр үзәге белгечләре авыл җирлекләрендә шулай ук балалар өчен ишегалды мәйданчыклары оештырдылар. Көндезге ял итү мәйданчыгында булып, балалар гаиләдән аерылмый, белгечләр күзәтүе астында торалар, бала көн буе кызыклы эшләр белән мәшгуль, ә кичен һәм ял көннәрендә ул гаиләдә.

Шук малайлар һәм кызлар өчен кызыклы уен программалары оештырылды. Тынгысыз белгечләр балалар белән викториналар, уеннар һәм конкурслар, экскурсияләр үткәрәләр. Балалар өчен ял итү өчен барлык шартлар тудыралар һәм мәйданчыкның һәр катнашучысында яшерен талантлар һәм сәләтләр ачарга булышалар.

Белгечләр Галина Кудряшова, Әлфия Уканеева һәм Оксана Семенова балалар өчен кызыклы программа әзерләде. Һәр көнне балалар мәйданчыкта музыка астында зарядка ясады, караоке җырлады, рәсем төшерде. Бер көн эчендә алар кинотеатрда «Лука» мультфильмын карады. Көн саен саф һавада хәрәкәтле уеннар уйнадылар, парклар, балалар мәйданчыклары белән таныштылар.

- Күптән түгел балалар белән бергә балалар өчен футболкаларда рәсем ясау буенча мастер-класс үткәрдек. Футболкаларда креатив рәсемнәр һәм күзгә ташланып торган язуларга мода беркайчан да узмый. Ул үзгәреп тора: мультфильм геройлары да, комикс персонажлары да, тормышны раслаучы фразалар да, популярлаша. Балалар өчен төрле шөгыль формалары һәрвакыт кызыклы. Балалар белән бергә сабын ясау буенча мастер-класс үткәрдек һәм оригиналь сабын әзерләдек. Алга таба кинотеатрга барачакбыз, Бишбүләк райпосының лимонад цехына экскурсия көтә, — дип сөйли Галина Кудряшова.

Авыл биләмәсенең яшьләр эшләре буенча белгече Лилия Шәфыйкова балалар өчен кызыклы ял оештырды. Балалар мәйданчыгына 10-15 бала йөри. Көн саен алар өчен кызыклы экскурсияләр, күңел ачу бәйгеләре үткәрелә. Лилия Разыйл кызы Андрей Захаров истәлегенә багышланган чишмә буйлап экскурсия үткәрде. Балалар беренче тапкыр аның барлыкка килү тарихын белде, истәлекле фоторәсемнәр ясады. Балаларга урманга бару, саф һавада төрле уеннар уйнау аеруча ошый. Җәй көне балалар күңел ачып кына калмыйча, бик күп яңалыклар да беләләр. Лилия Разыйл кызы «ашыгыч ярдәм» танып-белү уен-конкурсы үткәрде, анда балалар зыян күрүчеләргә беренче ярдәм күрсәтергә өйрәнде. Балалар мәйданчыкка бик теләп йөри, ә ата-аналар балаларның җәйге каникулларын дөрес үткәрүләренә ышана.

Карина ПАВЛОВА.

Фотолар шәхси архивлардан.