Авырлыклардан курыкмый

Сухоречкадан Гүзәл Гаяз кызы Зәкиева 10 ел дәвамында тотрыклы үсүче фермер хуҗалыгы башлыгы булып тора. Моннан тыш, ул кайгыртучан әни, искиткеч хатын һәм үз эше белән мавыккан ханым.

Гүзәл Гаяз кызы Ает авылында туып-үсә. Гаилә зур була, хуҗалык та кечкенә түгел, шуңа Күрә Гүзәл кечкенәдән өй эшләре белән җитез идарә итә. Ул әти-әниләренә аларның зур хуҗалыгында һәрчак булыша.

Ает урта мәктәбен тәмамлап, кыз Юматово авыл хуҗалыгы техникумына укырга керә. Биредә ул бухгалтер белеме ала һәм «Дим» колхозына икътисадчы булып урнаша. Яшь һәм энергияле Гүзәл үз вазыйфаларын җиңел үти. Бераздан читтән торып Башкорт авыл хуҗалыгы институтын экономист-оештыручы белгечлеге буенча тәмамлый. Тиздән кыз тормышында яшь кеше барлыкка килә.

Булачак ире Раил Әхәт улы Гүзәл белән 1990 елда таныша. Ул вакытта ул юнәлеш буенча күрше Южный авылында икътисадчы булып эшли. Танышып, берничә ай үткәч яшьләр туй үткәрә. Быел ирле-хатынлы 30 ел бергә гомер итүләрен билгеләп үткән.

1993 елда алар Сухоречкага, иренең әти-әнисе янына күчеп килә. Раил Әхәт улының әтисе - фермер. Улын фермерлык белән шөгыльләнергә этәргән дә инде. Раил Әхәт улы әтисе эшен дәвам итеп, районда иң яхшы фермерларның берсе була. Ә Гүзәл ул вакытта «Сухоречка» совхозында икътисадчы, бераз соңрак җирле авыл Советында хисапчы булып эшли, тик ешрак иренә хуҗалыкта ярдәм итә. 2011 елда үзе фермер хуҗалыгы оештыра. Хәзер бөтен гаилә авыл хуҗалыгы белән яши. Гүзәл үзе әйтүенчә, барлык гаилә әгъзаларына да мәшәкать җитәрлек. Балалары - кызлары Светлана, уллары Ринат һәм Рамил булыша. Хуҗалыкта ярдәмчеләрнең тату командасы эшли. Хәзерге вакытта крестьян (фермер) хуҗалыгында биш кеше рәсми рәвештә эшкә урнаштырылган.

2014 елда «2012-2014 елларга крестьян (фермер) хуҗалыклары базасында гаилә терлекчелек фермаларын үстерү» максатчан программасы кысаларында Гүзәл Зәкиева КФХ 1063800 сум күләмендә грант откан. Бу акчага МТЗ-82 тракторы һәм суыткыч арбасы сатып алынган.

- Дөресен генә әйткәндә, эшсез утырырга вакыт юк, — ди Гүзәл Гаязовна. - Бигрәк тә сезон чорында. Көн иртә таң белән башлана һәм төн уртасы узгач, бетә. Көн буе мәшәкатьләрдә. Безнең хезмәткәрләр өчен төшке ашны үзем әзерлим.

«Зәкиева Г.Г.» крестьян-фермер хуҗалыгы, районда күпләр кебек үк, сөт-ит терлекчелегендә һәм бөртекле культуралар үстерүдә махсуслаша. Бүгенге көндә хуҗалыкта чәчүлекләрнең гомуми мәйданы 800 га тәшкил итә.

- Уңыш начар түгел, азык әзерләнгән, кышлату тулы режимда узачак, — дип елмая Гүзәл Гаязовна.

Зәкиевлар гаиләсенең үз хуҗалыгы да кечкенә түгел - ике сыер, ике бозау, каз, үрдәк һәм тавыклар. Умарта асрыйлар. Сөт продукциясен нигездә җирле халыкка саталар. Гүзәл Гаязовна бакча һәм чәчәкләр үстерү белән шөгыльләнергә дә вакыт таба. Хуҗабикә әйтүенчә, күңелсезләнергә туры килми. Быел, имтиханнарны уңышлы тапшырып, машина йөртү хокукын алган.

Бүген Гүзәл Гаяз кызы уңышлы эшмәкәр. Ул - РФ Хезмәт ветераны. Агросәнәгать комплексы системасында озак еллар намуслы хезмәте өчен берничә тапкыр Авыл хуҗалыгы министрлыгының Рәхмәт хатлары белән бүләкләнгән.

Айгөл Гәрәева.

Фото Гүзәл Зәкиева архивыннан.